நடிகர் மதன் பாப் தனது 71 வயதில் காலமானார்...!

சென்னை அடையாறில் உள்ள இல்லத்தில் தனது 71 வயதில் அவர் காலமானதாக தெரிவிக்கப்படுகிறது.

குணச்சித்திர வேடங்களில் நடித்த நடிகர் மதன் பாப், தனது தனித்துவமான சிரிப்பால், இரசிகர்களை கவர்ந்தவர்.

இசையமைப்பாளராக திரை வாழ்க்கையைத் தொடங்கிய மதன் பாப், பின்னாளில், குணச்சித்திர நடிப்பில் முத்திரைப் பதித்தவர்.

இந்நிலையில் சென்னை அடையாறில் உள்ள இல்லத்தில், உடல் நலக்குறைவால், நடிகர் மதன் பாப் காலமானார்.

மதன் பாப்பின் இயற்பெயர் கிருஷ்ணமூர்த்தி இவருக்கு சுசிலா என்ற மனைவியும், ஜனனி என்ற மகளும், அர்ஷித் என்ற மகனும் உள்ளனர்.

புற்று நோயால் பாதிக்கப்பட்டிருந்த மதன் பாப், அதற்காக சிகிச்சை பெற்று மீண்டதாக கூறப்படும் நிலையில், (02) மாலை 5.00 மணியளவில் காலமானதாக தெரிவிக்கப்படுகிறது.

மதன் பாப்பின் உடல், சென்னை அடையாறில் உள்ள அவரது இல்லத்தில் அஞ்சலிக்காக வைக்கப்பட்டுள்ளது.

100க்கும் மேற்பட்ட படங்களில் நடித்துள்ள இவர் நீங்கள் கேட்டவை என்ற திரைப்படத்தின் மூலம் நடிகராக அறிமுகம் ஆனார்.

விஜய்யின் பூவே உனக்காக, ப்ரண்ட்ஸ், கண்ணுக்குள் நிலவு, யூத், நடிகர் அஜித் குமாரின் வில்லன், கமல்ஹாசனின் பம்மல் கே சம்மந்தம், வசூல் ராஜா MBBS உட்பட பல திரைப்படங்களில் நடித்துள்ளார்.